Pages

 

Tuesday, November 19, 2013

လွှတ်တော်ဆောင်ရွက်ချက် အာဏာရှင်စနစ်သို့ ဦးတည်

0 comments
 
 ယနေ့ မြန်မာ့နိုင်ငံရေးအခြေအနေသည် ဒီမိုကရေစီသို့ လျင်မြန်စွာပြောင်းလဲခဲ့သဖြင့် ဒီမိုက ရေစီအလေ့အထများနှင့် ပြည်သူလူထုမယဉ်ပါးသေးမီမှာပင် ဖွဲ့စည်းပုံပြင်ဆင်ရေး အကြပ်အတည်းကို ဆိုက်ရောက်လျက်ရှိပေသည်။ ၎င်းအပြင် တိုင်းရင်းသားလက်နက်ကိုင် အဖွဲ့အစည်းများမှာလည်း ဖယ်ဒရယ်ကို အကြောင်းပြပြီး ကိုယ်ပိုင်အုပ်ချုပ်ခွင့်ရလာအောင် ဖွဲ့စည်းပုံအခြေခံဥပဒေတွင်မပါ ၀င်သည့်အခွင့်အရေးများကို တောင်းဆိုလာသဖြင့် MPC မှ ဦးအောင်မင်းကိုယ်တိုင် စိတ်ဓာတ်ကျလျက် ရှိပြီး ရှေ့သို့ဆက်လက်ချီတက်နိုင်ရေး ၎င်း၏အကြံပေးများနှင့်ညှိနှိုင်းပြီး လက်နက်ကိုင်အဖွဲ့များနှင့် အပစ်အခတ်ရပ်စဲရေးလက်မှတ်မထိုးမီမှာပင် နိုင်ငံရေးပါတီများနှင့် ပေးတွေ့ရသည့်အခြေအနေသို့ ဆိုက်ရောက်လျက်ရှိပေသည်။
 
 ထိုသို့ အကြပ်အတည်းများနှင့် ဦးသိန်းစိန်အစိုးရအဖွဲ့ ရင်ဆိုင်ကြုံတွေ့နေစဉ်မှာပင် လွှတ်တော် ဥက္ကဌ(၂)ဦးမှာလည်း ရေနစ်သူ ၀ါးကူထိုးမပေးဘဲ နစ်သထက်နစ်အောင် လုပ်ဆောင်လာလျက်ရှိ ပေသည်။ အစိုးရမှ နိုင်ငံဖွံ့ဖြိုးတိုးတက်ရေးအတွက် တင်သမျှစီမံကိန်းများကို လွှတ်တော်ကကန့်သတ် တားမြစ်နေပေသည်။ ဦးသိန်းစိန်အစိုးရအနေနဲ့ နိုင်ငံရေးပြုပြင်ပြောင်းလဲမှုတွင် နိုင်ငံတကာမှအသိ အမှတ်ပြုခံရသော်လည်း စီးပွားရေးပြုပြင်ပြောင်းလဲမှုတွင် ထိရောက်သောအောင်မြင်မှုများ မရရှိဘဲ ဖြစ်နေပေသည်။ အစိုးရအနေဖြင့် စီမံကိန်းလုပ်ငန်းများ အကောင်အထည်ဖော်မည်ကြံလိုက် လူထုမှ ကန့်ကွက်လိုက်ဖြစ်နေသလို လွှတ်တော်မှလည်း ကန့်သတ်တားမြစ်နေသဖြင့် ရှေ့မတိုးနိုင်ဖြစ်နေ ပါသည်။
 
ယခုအချိန်သည် လွှတ်တော်အနေဖြင့် တိုင်းပြည်အကျိုးစီးပွားကိုကြည့်လျင် အစိုးရအဖွဲ့နှင့် ပူးပေါင်းဆောင်ရွက်သင့်သည့်အချိန်ဖြစ်သော်လည်း ကိုယ်ကျိုးအတ္တ၊ မာန်မာနများကြောင့်လွှတ်တော်မှ အစိုးရအဖွဲ့လုပ်ငန်းများ အောင်မြင်မှုမရှိအောင် ထိုးနှက်နေပေသည်။ နောက်တစ်ချက်အနေဖြင့် သူရဦးရွှေမန်းသည် တပ်မတော်တွင် ဦးသိန်းစိန်အထက်၌ နေလာရာမှ အရပ်ဘက်အစိုးရသို့ အသွင် ပြောင်းစတွင် ဦးသိန်းစိန်အား သမ္မတ ပေးလိုက်သည့်အတွက် ကြိတ်မနိုင်ခဲမရဖြစ်နေနိုင်ပါသည်။ ဦးသိန်းစိန်အစိုးရအနေဖြင့် သန့်ရှင်းသောအစိုးရ၊ ကောင်းမွန်သောအစိုးရတစ်ရပ်ဖြစ်ရေးကြွေးကြော်နေ သော်လည်း ပြည်ထောင်စုဝန်ကြီးများ၏ လုပ်ဆောင်ချက်များသည် ပြည်သူလူထုအတွက် ထောက်ပြ ဝေဖန်စရာများ မကြာခဏဖြစ်ပေါ်လာခဲ့ပါသည်။ ဖွဲ့စည်းပုံအခြေခံဥပဒေပါအတိုင်း လွှတ်တော် ကိုယ်စားလှယ်များအား ခံစားခွင့်များထိုက်သင့်သည့်အားလျော်စွာ ပေးအပ်ထားသော်လည်း ကိုယ်စား လှယ်များမှ အစိုးရအဖွဲ့ဝန်ကြီး၊ ဒုတိယ၀န်ကြီးများနှင့်နှိုင်းယှဉ်၍ နည်းသည်ဟု ယူဆနေပါသည်။ ဦးရွှေမန်းမှ ထိုအားနည်းချက်ကို အခွင့်အကောင်းယူကာ လွှတ်တော်ကိုယ်စားလှယ်များကို စည်းရုံးခဲ့ ပါသည်။ ၎င်းဘက်သို့ လွှတ်တော်ကိုယ်စားလှယ်များပါလာသည့်အခါတွင် အစိုးရအဖွဲ့အား စတင် တိုက်ခိုက်ခဲ့ပါသည်။ ဖွဲ့စည်းပုံအခြေခံဥပဒေဆိုင်ရာ ခုံရုံးတစ်ဖွဲ့လုံးနှုတ်ထွက်စေခြင်း၊ အစိုးရဆောင် ရွက်ချက်များအား တားဆီးကန့်သတ်ြခင်း Right to Recall ဥပဒေပြဋ္ဌာန်းဖြစ်ခြင်းအား ဆိုင်းငံ့ခြင်း တို့ကို ပြုလုပ်ခဲ့ပါသည်။
 
ယခုအခါ လွှတ်တော်ဝန်ထမ်း ၁၉၀ ဦးအား အစိုးရရာထူးဝန်အဖွဲ့အား အသိမပေးဘဲ ပြောင်ပြောင်တင်းတင်းပင် တစ်ဆင့်မြင့်ရာထူးများတိုးပေးခြင်း၊ သမ္မတ၏လစာခံစားခွင့် သိန်း(၅၀) အစား (၁၅)သိန်းသာ သမ္မတမှခံစားသည်ကို ဥပဒေချိုးဖောက်သည်ဟု စွပ်စွဲပြစ်တင်ခြင်းများ ပြုလုပ် လာသည့်အပြင် လွှတ်တော်ကိုယ်စားလှယ်များအား ယခင်(၃)သိန်းကျပ်မှ (၆)သိန်းကျပ်သို့ တိုးမြှင့် ခံစားခွင့်ပြုရန် လွှတ်တော်မှဆောင်ရွက်လာခြင်းများသည် အစိုးရကို မထီမဲ့မြင်ပြုခြင်းဖြစ်သည်ဟု ယူဆရပေသည်။ အမှန်တကယ်(၆)သိန်းကျပ်သာ ခံစားစေပါက ပြည်သူလူထုထံမှ ကောက်ခံရရှိသည့် အခွန်ငွေများကို ဆင်းရဲတွင်းနက်နေသည့် ပြည်သူလူထုအကျိုးစီးပွားအား အသုံးမပြုဘဲ လွှတ်တော် ကိုယ်စားလှယ်များကို တိုးမြှင့်ခံစားစေပါက တစ်လလျှင် ပြည်သူ့ဘဏ္ဍာငွေထဲမှ လစဉ်ကျပ်သိန်း (၂၀၀၀)ခန့် ကုန်ကျစေမည်ဖြစ်ပါသည်။

လွှတ်တော်နှင့်အစိုးရကြား အာဏာလွန်ဆွဲမှုကြောင့် ကြားထဲမှပြည်သူများအား မြေဇာပင်မဖြစ် စေလိုပါ။ လွှတ်တော်နှင့်အစိုးရ၊ တပ်မတော်၊ ပြည်သူစုံညီစွာဖြင့် အမိမြန်မာနိုင်ငံတော်ကြီး ဒီမိုကရေစီ စနစ်ရှင်သန်အောင် ချီတက်စေလိုကြောင်း ဆန္ဒပြုအပ်ပါသည်။ ယခုလက်ရှိ မြန်မာ့နိုင်ငံရေးအနေ အထားသည် အစိုးရအား လွှတ်တော်မှအတိုင်းအတာတစ်ခုထိ ထိန်းချုပ်နိုင်သော်လည်း ဦးရွှေမန်း ဦးဆောင်သည့် လွှတ်တော်အားထိန်းချုပ်နိုင်သူ ကင်းမဲ့လျက်ရှိပေသည်။ လွှတ်တော်အား ယခုအတိုင်း ထိန်းချုပ်မှုမပြုလုပ်နိုင်ပါက ဒီမိုကရေစီစနစ်သို့ ဦးတည်ချီတက်ရင်း အာဏာရှင်စနစ်သို့ ပြန်လည် ရောက်ရှိသွားစေနိုင်ကြောင်း ရေးသားလိုက်ရပါသည်။
 
မောင်မောင်သိန်း
 


No comments: